Në vijueshmërine e arritjeve dhe aktiviteteve te Universitetit “Aleksandër Moisiu” Durrës, u zhvillua më 16 Prill 2012, ceremonia e inagurimit, të ndërtimit të Kabinetit të ri Informatik.

Ky projekt u realizua nën kujdesin e veçantë të Rektorit, Prof. As. Dr. Mit’hat Mema, Dekanes së Fakultetit të Teknologjisë së Informacionit pranë këtij institucioni, Znj. Lindita Mukli,  si dhe koordinatorit të Agjensisë Turke për Zhvillim dhe Koordinim (TIKA) në Tiranë Z. Yahya Gülseven. 

Kabineti i ri Informatik është projektuar sipas standarteve të fundit duke përfshirë, rehabilitim të ambienteve të brendshme, pajisje me kompiutera desktop e laptop, smartboard, projektor, printera, si dhe kompiutera server të fuqishem të cilët do të mundësojnë komunikimin e studentëve dhe pedagogëve gjatë orëve të mësimit nëpërmjet një infrastrukture të centralizuar.

Kjo nismë ka për qëllim, lehtësimin e mësimdhënies dhe mësimnxënies duke shfrytëzuar mjetet TIK. Kabineti informatik është planifikuar për t’u shfrytëzuar nga studentët e pedagogët e Fakultetit të Teknologjisë së Informacionit si dhe do të shërbejë si sallë trajnimesh e seminaresh të ndryshme.   

Të pranishëm në ceremoninë e inagurimit të kabinetit ishin Ministri i Arsimit dhe Shkencës Z. Myqerem Tafaj, Ambasadori i Republikës së Turqisë, Z. Hasan S. AŞAN,  Rektori Prof. As. Dr. Mit’hat Mema, si edhe koordinatori i Zyrës TIKA në Tiranë Z. Yahya Gülseven, të cilët dhanë një kontribut të veçantë për realizimin e këtij projekti, avangard dhe bashkëkohor në përmirësimin e cilësisë së Arsimit të Lartë në Shqipëri.